Граматы (прывілеі) абласныя. Прывілей Віцебскай зямлі 1503 года

ГРАМАТЫ (ПРЫВІЛЕІ) АБЛАСНЫЯ

ГРАМАТЫ АБЛАСНЫЯ - дзяржаўна-прававыя акты Вялiкага княства Лiтоўскага, якiмi замацоўвалiся аўтаномныя правы некаторых зямель (княстваў, ваяводстваў, паветаў). Найбольш вядомымi былi граматы: Вiцебскiя - 1503, 1509, 1561 гг., Полацкiя - 1511, 1547, 1580, 1634 гг., Смаленская - 1505 г., Бельскiя - 1501, 1547 гг., Драгiчынскiя - 1511, 1547 гг., Мсцiслаўская -1551 г.

Нормы, змешчаныя ў абласных граматах, паходзiлi: па-першае, з мясцовага звычаёвага права, выпрацаванага ў час, калi многiя з гэтых зямель былi самастойнымi дзяржавамi, i ix насельнiцтва, выбiраючы сабе князя, заключала з iм пагадненне, у якiм былi абумоўлены правы i абавязкi як князя, так i народа; па-другое, з папярэднiх нарматыўных актаў; па-трэцяе, з норм, выпрацаваных адмiнiстрацыйнай i судовай практыкай.

Найбольш тыповымi абласнымi граматамi можна лiчыць Вiцебскую 1503 г., Смаленскую 1505 г. i Полацкую 1511 г. У ix замацаваны старадаўнiя абавязкi князя i мясцовага ваяводы дзейнiчаць толькi згодна з мясцовым правам, захоўваць аўтаномныя правы дадзенай зямлi, не умешвацца ў царкоўныя справы, забяспечваць маёмасныя i асабiстыя правы.

Прызначэнне ваяводы ў Вiцебск або ў Полацк адбывалася толькi са згоды мясцовых правячых колаў. «А который будет воевода наш нелюб им, ино нам им воеводу иншого дати по их воли» (АЗР. Т. 2. № 27).

Судзiць палачанiна можна было толькi ў Полацку па полацкiм праве «с полочаны по испросу».

Баяры i мяшчане гэтых зямель карысталiся правам свабодна выязджаць у замежныя краiны.

Выданне абласных грамат i ix неаднаразовае пацверджанне сведчаць аб рашучасцi народа абараняць сваё старажытнае права i аб дасканаласцi гэтага права. Гэтыя граматы з'яўляюцца каштоўнай крынiцай вывучэння гiсторыi народа, яго прававога становiшча, сацыяльнай i саслоўнай структуры грамадства.

ПРЫВIЛЕЙ ВІЦЕБСКАЙ ЗЯМЛІ 1503 года

16.07.1503 г.

Сам Александр, Божьею милостью король Польский, великий князь Литовский, Руский, княжа Пруское, Жомоитский и иных, чиним знаменито сим нашим листом, хто на него посмотрит, альбо чтучи его въслышит нинешним и потом будучим, кому будет потреба того ве-дати. Били намъ чолом вси князи и бояре и слуги витебский, и войт и мещане места Витебского, и вся земля Витебская, и поведили перед нами, штож пришодши злодеи з Великого Новагорода покрали в них церьков пречистое Богоматери, и в той церькви и привилей ихъ вкрали, который же они от отца нашого короля его милости мели, и копию того привилья перед нами клали и били нам чолом, абыхмо им наш лист привилей потомуж дали. Ино мы з ласки нашое, за их к нам верную службу, пожаловали есмо их тым, дали им наш лист, потомуж как отец наш король его милость им дал был:

[1] Штож нам в домы церковный, в дом Божий светое Богородицы, и в дом Божий Светого Духа, и теж в дом Божий Благовещенья Пречистое и в иные церькви не вступатися. И в купленины, который будуть куплены з нашим дозволеньем, и в безадщины и в отмерщины Витебский теж не маем вступатися. И жон их силою замуж не давати, а который Витблянин, вмирая, откажет остаток своего именья кому, и въ то нам не вступатися.

[2] А в подводы коней в городских людей и в поселских путных не брати.

[3] А холопу и робе веры не няти, а о обаде исправа дати.

[4] А предков наших великих князей судов не посуживати: чинити нам з Витбляны по испросу, а без исправы Витблянина не казнити; а своих судов, судивши, не посуживати, а вина прийдет, ино нам их по вине казнити.

[5] А чоломъ-битье нам у Витблян приймати, через поруку в железа их не сажаючи, а ни в которую муку.

[6] А отчин в них не отнимати, також и в села их купленыи и в поля не вступатися.

[7] А на заочьное поведанье не верити; а хто имет нам их обмовляти, того нам Витбляном объявити, а въ заставу нигде Витблян не сажати.

[8] А на войну быти им с нами посполу готовым.

[9] А по волости по Витебской воеводе нашому не ездити, а поедет в ловы, ино его по станом не дарити.

[10] А станеться в которого Витблянина татьба, а доищуться татьбы лицом: ино Витблянину вся татьба лицом вернути, а чого лицом не доищуться которое татьбы, ино истьцу с татиного дому жоною его и детми заплатити его гибель, а в том тати мы вольны; а не будетъ у татя чим платити татьбы, ино его истьцу выдати, и где его всхочет там его денет.

[11] А сябров городских в пригод наш не гнати, а ни в подводы, а ни в ловы.

[12] Також и в весы витебский, в ни в локоть нам не вступатися, а коли который Витблянин у весех преступить, або у пркти, ино Витбляном самим казнити виноватого, по своему праву, а нам в то не вступатися.

[13] А в которого Витблянина загудят воск в Ризе, або инде, а приедет до Витебска: ино Витбляном, самим казнити виноватого, а нам в то не вступатися.

[14] А где чыя отчина, селца, реки, або озера, нам и в то не вступатися, а Витбляном наших рек або озер не таити, а хто потаить, ино нам тых карати.

[15] А Витбляны намъ не даритися никому.

[16] Также есмо им и мыта отпустили по всей отчине нашой вечно.

[17] И еще пожаловали есмо их, придали им, на садибу и на выгон, Койтин бор, а Михайловский бор, а Заручевьский бор.

[18] Теж, который Витбляне межи собою побъються, а за децким поеднаються, ино нам куница шерстью зъмирьщины; а коли о чом по-сваряться и выдадуть ся в колце оба, то вина на нас; а выдасть ся один, а другий не выдасть ся, за то их нам не казнити.

[19] А за закладную куницу на нас брати по десяти грошей, а борцу по два грошы, також децкованье от рубля по чотыри грошы, а на милю по грошу; а владычиному слузе и боярскому потомуж децкованье.

[20] И тежъ владыце на попех Витебских зборная куница шерьстью.

[21] Також им нам давати воеводу по старому, по их воли, и который им будет нелюб воевода, а збмовят его перед нами: ино нам воеводу им иного дати, по их воли; а приехавши воеводе нашому к Витебску, первого дня целовати ему крест к Витбляном, на том, штож без права их не казнити по вадам ни в чом.

[22] Также Витбляном жити у Витебску доброволно, всякому, по старому, покуль хто всхочетъ; а которому Витблянину будет от нас насилно, а будет ему нелюбо: нам его силою не держати, ино ему путь чист, куды хочет, безо всякое зачепки; а пойти ему проч в нашу отчину в Литву, не тайно, Светому Благовещенью - чолом ударивши и нашому воеводе объявивъся и своей братьи мужом Витбляном, а во своем именьи волен во всем: идя проч продаст, або откажет, нам в то не вступатися.

[23] Також который ся от насилья жаловати будетъ нам Витблянин на Витблянина ж, приехав в Литву: и без истьца нам на него децкого з Литвы не слати, давати ему наш лист к нашому воеводе, хотя бы о смертной вине, а ему судити по целованью, нашим судом, досмотревши права с князи и з бояры и з мещаны, а осудивши его казнити у Витебску, по их праву.

[24] Теж который будет князь, або боярин або слуга, або мещанин што выслужил на предкох наших великих князех, того нам у Витблян не отнимати по грамотам тых князей; а местичов Витебских з города Витебска не вести вон.

[25] Такъже который будуть, Литвин, або Лях, крещены были у Витебску в Рускую веру, а хто из того роду и тепере живет, того нам не рушити, права их хрестияньского ни в чом не ломити.

А на то на все дали есмо им сесь наш лист твердо и вечно, и печать нашу казали есьмо привесити к сему нашому листу.

Писан у Вильни, в лето 7011, месяца июля в 16-й день, индикта 6.

При том были:

[1] бискуп Виленский, князь Войт(е)х,

[2] а воевода Виленский, канцлер пан Миколай Радивилович,

[3] а маршалок охмистр королевое, наместник Ковенский, пан Войтех Янович,

Ивашко Сопежич, писар.

***

Тэкст дакумента друкуецца з некаторымi змяненнямi паводле выдання: Владимирский-Буданов М.Ф. Хрестоматия по истории русского права. Вып.З. С. 46-51.

Гл. таксама: АЗР Т.1: 1340-1506. СПб., 1846. N.204.

Вiшнеўскi А.Ф., Юхо А.Я. Гiсторыя дзяржавы i права Беларусi: У дакументах i матэрыялах (са старажытных часоў да нашых дзён). - Мн., 1998. - С. 68-71.