977 — 1117 гг. — Из «Повести временных лет» о междоусобной борьбе, вооруженных походах, завоевании новых земель и грабежах князей-феодалов

1. В лето 6485 [977]. Поиде Ярополк на Олга, брата своего, на Деревьску землю. И изиде противу его Олег, и ополчистася. Ратившемася полкома, победи Ярополк Ольга. Побегъшю же Ольгу с вой своими в град, рекомый Вручий, бяше черес гроблю мост ко вратом градным, теснячеся друг друга пихаху в гроблю. И спехнуша Ольга с мосту в дебрь. Падаху людье мнози, и удавиша кони человеци. И въшед Ярополк в град Ольгов, перея власть его, и посла искать брата своего; и искавъше его не обретоша. И рече един Деревлянин: «Аз видех, яко вчера спехнуша с мосту». И посла Ярополк искат брата, и влачиша трупье из гробли от утра и до полудне, и налезоша и Ольга высподи трупья, вынесоша и, и положиша и на ковре. И приде Ярополк, над нем плакася, и рече Свеналду: «Вижь, сего ты еси хотел!». И погребоша Ольга на месте у города Вручога, и есть могила его и до сего дне у Вручего. И прия власть его Ярополк. У Ярополка же жена Грекини бе, и бяше была черницею; бе бо привел ю отець его Святослав, и вда ю за Ярополка, красоты ради лица ея. Слышав же се Володимър в Новегороде, яко Ярополк уби Ольга, убоявся бежа за море. А Ярополк посадники своя посади в Новегороде, и бе володея един в Руси.

2. В лето 6488 [980]. Приде Володимир с Варяги Ноугороду, и рече посадником Ярополчим: «Идете к брату моему и рцете ему: Володимер ти идеть на тя, пристраивайся противу биться». И седе в Новегороде.

И посла ко Рогъволоду Полотьску, глаголя: «Хочю пояти дщерь твою собе жене». Он же рече дщери своей: «Хочеши ли за Володимера?». Она же рече: «Не хочю розути робичича, но Ярополка хочю». Бе бо Рогъволод пришел и-заморья, имяше власть свою в Полотьске, а туры Турове, от него же и туровци прозвашася. И придоша отроци Володимерови, и поведаша ему всю речь Рогънедину, дщери Рогъволоже, князя полотьскаго. Володимер же собра вои многи, Варяги и Словени, Чюдь и Кривичи, и поиде на Рогъволода. В се же время хотячу Рогънедь вести за Ярополка. И приде Володимер на Полотеск, и уби Рогъволода и сына его два, и дъчерь его поя жене.

3. В лето 6489 [981]. Иде Володимер к Ляхом и зая грады их, Перемышль, Червен и ины грады, иже суть и до сего дне под Русью. В сем же лете и вятичи победи, и възложи на ня дань от плуга, яко же и отець его имаше.

4. В лето 6491 [983]. Иде Володимер на Ятвягы, и победи Ятвягы, и взя землю их.

5. В лето 6492 [984]. Иде Володимер на Радимичи. Бе у него воевода Волъчий Хвость, и посла и Володимер перед собою Волъчья Хвоста; сърете Радимичи на реце Пищане, и победи Радимиче Волъчий Хвост. Темь и Русь корятся Радимичем, глаголюще: «Пищаньци волъчья хвоста бегають». Быша же Радимичи от рода Ляхов; прешедъше ту ся вселиша, и платять дань Руси, повоз везуть и до сего дне.

6. [В лето 6495 (987)]. Володимер же просвещен сам, и сынове его, и земля его. Бе бо у него сынов 12: Вышеслав, Изяслав, Ярослав, Святополк, Всеволод, Святослав, Мьстислав, Борис, Глеб, Станислав, Позвизд, Судислав. И посади Вышеслава в Новегороде, а Изяслава Полотьске, а Святополка Турове, а Ярослава Ростове. Умершю же старейшему Вышеславу Новегороде, посадиша Ярослава Новегороде, а Бориса Ростове, а Глеба Муроме, Святослава Деревех, Всеволода Володимери, Мстислава Тмуторокани. И рече Володимер: «Се не добро, еже мал город около Киева». И нача ставити городы по Десне, и по Востри, и по Трубежеви, и по Суле, и по Стугне. И поча нарубати муже лучшие от Словень, и от Кривичь, и от Чюди, и от Вятичь, и от сих насели грады; бе бо рать от Печенег. И бе воюя ся с ними и одолая им.

7. В лето 6529 [1021]. Приде Брячислав, сын Изяславль, внук Володимерь, на Новъгород, и зая Новъгород, и поим Новгородце и именье их, поиде Полотьску опять. И пришедшю ему к Судомири реце, и Ярослав ис Кыева в 7 день постиже и ту. И победи Ярослав Брячислава, и Новгородце вороти Новугороду, а Брячислав бежа Полотьску.

8. В лето 6546 [1038]. Ярослав иде на Ятвягы.

9. В лето 6548 [1040]. Ярослав иде на Литву.

10. [В лето 6552 (1044)]. В се же лето умре Брячислав, сын Изяславль, внук Володимерь, отець Всеславль, и Всеслав, сын его, седе на столе его, его же роди мати от вълхвованья. Матери бо родивши его, бысть ему язвено на главе его, рекоша бо волсви матери его: «Се язвено навяжи на нь, да носить е до живота своего», еже носить Всеслав и до сего дне на собе; сего ради немилостив есть на кровьпролитье.

11. В лето 6575 [1067]. Заратися Всеслав, сын Брячиславль, Полочьске, и зая Новъгород. Ярославичи же трие, — Изяслав, Святослав, Всеволод, — совокупивше вой, идоша на Всеслава, зиме сущи велице. И придоша ко Меньску, и меня не затворишася в граде. Си же братья взяша Менеск, и исекоша муже, а жены и дети вдаша на щиты, и поидоша к Немизе, и Всеслав поиде противу. И совокупишася обои на Немизе, месяца марта в 3 день; и бяше снег велик, и поидоша противу собе. И бысть сеча зла, и мнози подоша, и одолеша Изяслав, Святослав, Всеволод, Всеслав же бежа. По семь же, месяца нуля в 10 день, Изяслав, Святослав и Всеволод, целовавше крест честный к Всеславу, рекше ему: «Приди к нам, яко не створим ти зла». Он же, надеявъся целованью креста, перееха в лодьи черес Днепр. Изяславу же в шатер предъидущю, и тако яша Всеслава на Рши у Смолиньска, преступивше крест. Изяслав же привед Всеслава Кыеву, всади и в поруб с двема сынома.

12. [В лето 6576 (1068)]. Изяславу же со Всеволодом Кыеву побегшю, а Святославу Чернигову, и людье Кыевстии прибегоша Кыеву, и створиша вече на торговищи, и реша, пославшеся ко князю: «Се Половци росулися по земли; дай, княже, оружье и кони, и еще бьемся с ними». Изяслав же сего не послуша. И начаша людие говорити на воеводу на Коснячька: идоша на гору, с веча, и придоша на двор Коснячков, и не обретше его, сташа у двора Брячиславля и реша: «Пойдем, высадим дружину свою ис погреба». И разделишася надвое: половина их иде к погребу, а половина их иде по Мосту; си же придоша на княжь двор. Изяславу же седящю на сенех с дружиною своею, начаша претися со князем, стояще доле. Князю же из оконця зрящю и дружине стоящи у князя, рече Тукы, брат Чюдин, Изяславу: «Видиши, княже, людье възвыли; поели, ат Всеслава блюдуць». И се ему глаголющю, другая половина людий приде от погреба, отворивше погреб. И рекоша дружина князю: «Се зло есть; поели ко Всеславу, ат призвавше лестью ко оконцю, пронзуть и мечемь». И не послуша сего князь. Людье же кликнуша, и идоша к порубу Всеславлю. Изяслав же се видев, со Всеволодом побегоста з двора, людье же высекоша Всеслава ис поруба, в 15 день семтября, и прославиша и среде двора къняжа. Двор жь княжь разграбиша, бещисленое множьство злата и сребра, кунами и белью. Изяслав же бежа в Ляхы.

13. В лето 6577 [1069]. Поиде Изяслав с Болеславом на Всеслава; Всеслав же поиде противу. И приде Белугороду Всеслав, и бывши нощи, утаивъея кыян бежа из Белагорода Полотьску. Заутра же видевше людье князя бежавша, възвратишася Кыеву, и створиша вече, и послашася к Святославу и к Всеволоду, глаголюще: «Мы уже зло створили есмы, князя своего прогнавше, а се ведеть на ны Лядьскую землю, а поидета в град отца своего; аще ли хочета, то нам неволя: зажегше град свой, ступим в Гречьску землю». И рече им Святослав: «Ве послеве к брату своему; аще поидеть на вы с Ляхы губити вас, то ве противу ему ратью, не даве бо погубити града отца своего; аще ли хощеть с миром, то в мале придеть дружине». И утешиста Кыяны. Святослав же и Всеволод посласта к Изяславу, глаголюща: «Всеслав ти бежал, а не води Ляхов Кыеву, противна бо ти нету; аще ли хощещи гнев имети и погубите град, то веси, яко нама жаль отня стола». То слышав Изяслав, остави Ляхы и поиде с Болеславом, мало Ляхов поим; посла же пред собою сына своего Мьстислава Кыеву. И пришед Мьстислав, исече кияны, иже беша высекли Всеслава, числом 70 чади, а другыя слепиша, другыя же без вины погуби, не испытав. Изяславу же идущю к граду, изидоша людье противу с поклоном, и прияша князь свой Кыяне; и седе Изяслав на столе своемь, месяца мая в 2 день. И распуща Ляхы на покорм, и избиваху Ляхы отай; и възвратися в Ляхы Болеслав, в землю свою. Изяслав же възгна торг на гору, и прогна Всеслава ис Полотьска, посади сына своего Мьстислава Полотьске; он же вскоре умре ту. И посади в него место брата его Святополка. Всеславу же бежавшю.

14. В лето 6579 [1071]. Воеваша Половци у Растовьця и у Неятина. В се же лето выгна Всеслав Святополка ис Полотьска. В се же лето победи Ярополк Всеслава у Голотичьска.

15. [В лето 6604 (1096)]. Сего же месяца приде Тугоркан, тесть Святополчь, к Переяславлю, месяца мая 30 и ста около града, а переяславьци затворишася в граде. Святополк же и Володимер поидоста на нь по сей стороне Днепра, и придоста к Зарубу, и ту перебродистася, и не очютиша их Половци, богу схраншю их, и исполчившася поидоста к граду; гражане же узревше, ради быша, и поидоша к нима, а Половци стояху на оной стороне Трубежа, исполчившеся. Святополък же и Володимер вбредоста в Трубежь к Половцем, Володимер же хоте нарядити полк, они же не послушаша, но удариша в коне к противным. Се видевше Половци и побегоша, а наши погнаша в след ратных, секуще противьныя. И сдея господь в т день спасенье велико: месяца иулия в 19 день побежени быша иноплеменници, и князя их, убиша Тугоркана и сына его и ини князи; мнози врази наши ту падоша.

16. [В лето 6605 (1097)]. Володимер же слышав, яко ят бысть Василко и слеплен, ужасеся, и всплакав и рече: «Сего не бывало есть в Русьскей земьли ни при дедех наших, ни при отцих наших, сякого зла». И ту абье посла к Давыду и к Олгови Святославичема, глаголя: «Поидета к Городцю, да поправим сего зла, еже ся створи се в Русьскей земьли и в нас в братьи, оже ввержен в ны ножь. Да аще сего не правим, то болшее зло встанет в нас, и начнеть брат брата закалати, и погыбнеть земля Руская, и врази наши, Половци, пришедше возмуть земьлю Русьскую». Се слышав Давыд и Олег, печална быста велми и плакастася, рекуще, яко «Сего не было в роде нашемь». И ту абье собравша вое, придоста к Володимеру. Володимеру же с вои стоящю в бору, Володимер же и Давыд и Олег послаша муже свои, глаголюще к Святополку: «Что се зло створил еси в Русьстей земли, и ввергл еси ножь в ны? Чему еси слепил брат свой? Аще ти бы вина кая была на нь, обличил бы и пред нами, и упрев бы и, створил ему. А ноне яви вину его, оже ему се створил еси». И рече Святополк, яко «Поведа ми, Давыд Игоревич: яко Василко брата ти убил, Ярополка, и тебе хочет убити и заяти волость твою, Туров, и Пинеск, и Берестие и Погорину, и заходил роте с Володимером, яко сести Володимеру Кыеве, а Василкови Володимери. А неволя ми своее головы блюсти. И не яз его слепил, но Давыд, и вел и к собе». И реша мужи Володимери, и Давыдови и Олгови: «Извета о семь не имей, яко Давыд есть слепил и. Не в Давыдове городе ят, ни слеплен, но в твоемь граде ят и слеплен». И се им глаголющим разидошася разно.

17. [В лето 6605 (1097)]. Святополку же обещавшюся прогнати Давыда, поиде к Берестью к Ляхом. Се слышав Давыд иде в Ляхы в Володиславу, ища помощи. Ляхове же обещашася ему помагати, и взяша у него злата 50 гривен, рекуще ему: «Пойди с нами Берестью, яко се вабит ны Святополк на снем, и ту умирим тя с Святополком». И послушав их Давид, иде Берестью, с Володиславом. И ста Святополк в граде, а Ляхове на Бугу, и сослася речьми Святополк с Ляхы, и вдасть дары великы на Давыда. И рече Володислав Давыдови: «Не послушаеть мене Святополк, да иди опять». И приде Давыд Володимерю, и Святополк, съвет створи с Ляхы, поиде к Пиньеку, послав повое. И приде Дорогобужю, и дожда ту вой своих, и поиде на Давыда к граду, и Давыд затворися в граде, чая помощи в лясех, беша бо ему рекли, яко «Аще придуть на тя русскые князи, то мы ти будем помощници»; и солгаша ему, емлюще злато у Давыда и у Святополка. Святополк же оступи град, и стоя Святополк около града 7 недель; и поча Давыд молитися: «Пусти мя из града». Святополк же обещася ему, и целоваста крест межи собою, и изиде Давыд из града, и приде в Червен, а Святополк вниде в град в великую суботу, а Давыд бежа в Ляхы.

18. [В лето 6605(1097)]. Ярослав же бежа на Ляхы, и приде Берестью, а Давыд заим Сутеску и Червен, приде внезапу, и зая Володимерце, а Мстислав затворися в граде с засадою, иже беша у него Берестьяне, Пиняне, Выгошевци. И ста Давыд, оступив град, и часто приступаше. Единою подступиша к граду под вежами, онем же бьющим с града, и стреляющим межи собою, идяху стрелы акы дождь. Мстиславу же хотящю стрелити, внезапу ударен бысть под пазуху стрелою на заборолех, сквозе дску скважнею, и сведоша и, и на ту нощь умре. И таиша и 3 дни, и в 4-й день поведаша на вечи. И реша людье: «Се князь убьен; да аще ся вдамы, Святополк погубит ны вся». И послаша к Святополку, глаголюще: «Се сын твой убьен, а мы изнемогаем гладом. Да аще не придеши, хотять ся людье предати, не могуще глада терпети». Святополк же посла Путяту, воеводу своего. Путята же с вой пришед к Лучьску к Святоши, сыну Давыдову, и ту бяху мужи Давыдови у Святоше, заходил бо бе роте Святоша к Давыдови: «Аще поидеть на тя Святополк, то повемь ти». И не створи сего Святоша, но изъима мужи Давыдовы, а сам поиде на Давыда. И приде Святоша и Путята августа в 5-й день, Давыдовым воем облежащим град, в полуденье, Давыдови спящю, и нападоша на ня, и почаша сечи. И горожане скочиша з града, и почаша сечи вое Давыдовы, и побеже Давыд и Мстислав, сыновець его. Святоша же и Путята прияета град, и посадиста посадника Святополча Василя.

19. В лето 6609 [1101]. Преставися Всеслав, полоцкий князь, месяца априля в 14 день, в 9 час. дне, в среду.

20. [В лето 6612 (1104)]. Се же скажем: сего же лета исходяща, посла Святополк Путяту на Менеск, а Володимер сына своего Ярополка, а Олег сам иде на Глеба, поемше Давыда Всеславича; и не успеша ничто же, и възвратишася опять.

21. [В лето 6613 (1105)]. Томь же лете постави Мину Полотьску декабря в 13 день.

22. В лето 6620 [1112]. Индикта 5. Ярослав ходи на Ятвезе, сын Святополчь, и победи я.

23. В лето 6624 [1116]. Приходи Володимер на Глеба; Глеб бо бяше воевал Дреговичи и Случеск пожег, и не каяшеться о сем, ни покаряшеться, но боле противу Володимеру глаголюще, укаряя и. Володимер же, надеяся на бога и на правду, поиде к Меньску с сынъми своими и с Давыдом Святославичем, и Олговичи. И взя Вячеслав Ръшю и Копысу, а Давыд с Ярополком узя Дрьютеск на щит, а Володимер сам поиде к Смоленьску; и затворися Глеб в граде. Володимер же нача ставити истьбу у товара своего противу граду. Глебови же, узрившю, оужасеся сердцемь и нача ся молити Глеб Володимеру, шля от себе послы. Володимер же съжали си темь, оже проливашеться кровь в дьни постъныя великого поста, и вдасть ему мир. Глеб же, вышед из города с детми и с дружиною, поклонися Володимеру, и молвиша речи о мире, и обещася Глеб по всему послушати Володимера. Володимер же, омирев Глеба и наказав его о всем, вдасть ему Менеск, а сам възратися Киеву. Ярополк же сруби город Желъди Дрьючаном, их же бе полонил.

24. [В лето 6625 (1117)]. Того же лета въведе Глеба из Меньска Володимер и церковь заложи на Льте мученику.

Повесть временных лет, ч. 1. Изд. АН СССР, 1950.

Белоруссия в эпоху феодализма : сборник документов и материалов : в 3 т. / редкол.: А.П. Азаров, А.М. Карпачев, Е.И. Карнейчик ; сост.: З.Ю. Копыльский и др. ; Ин-т истории АН БССР, Арх. упр. МВД БССР. – Минск : Издательство Академии наук БССР, 1959–.
Т. 1 : С древнейших времен до середины XVII века. – Минск : Издательство Академии наук БССР, 1959. – С. 35–41.