Вынікі каля 20 даследаванняў ляглі ў аснову Канцэпцыі інфармацыйнай бяспекі
Аб гэтым заявіў начальнік інфармацыйна-аналітычнага ўпраўлення Дзяржаўнага сакратарыята Савета бяспекі Беларусі Аляксей Банькоўскі на спецыянальнай прэс-канферэнцыі, прысвечанай Канцэпцыі інфармацыйнай бяспекі Беларусі.
Аляксей Банькоўскі расказаў, што гэты праект распрацоўваўся на працягу некалькіх гадоў. Былі задзейнічаны практычна ўсе члены міжведамаснай камісіі па бяспецы ў інфармацыйнай сферы пры Савеце бяспекі. Паводле яго слоў, у аснове Канцэпцыі ляжаць вынікі аналітычных даследаванняў Дзяржаўнага сакратарыята, іх было праведзена каля 20.
Міністр інфармацыі Беларусі Аляксандр Карлюкевіч адзначыў, што так ці інакш многія пазіцыі Канцэпцыі інфармацыйнай бяспекі наўпрост звязаныя з эканомікай – з тым, што вызначае жыццядзейнасць нашай краіны і грамадства. Ён, натуральна, выказаўся і з нагоды СМІ: па яго словах, сёння хапае на практыцы тых рэсурсаў, якія могуць працаваць з самымі рознымі навінамі і даваць ім прававую ацэнку. Гэтыя рэсурсы ёсць і ў Міністэрства інфармацыі, ёсць заканадаўчая база, створана сістэма.
У прыклад ён прывёў тое, як працуе Мінінфарм з сайтамі, якія парушаюць заканадаўства, – іх своечасова блакуюць. Што датычыцца аператыўнай рэакцыі на фэйкавыя навіны, то Аляксандр Карлюкевіч сказаў, што не ўсе рэалізуюць ініцыятывы, у тым ліку дзяржаўнага апарату, і гэта звязана не з тым, што іх не падтрымліваюць, проста трэба ўзважана падысці да таго, наколькі такія ініцыятывы адпавядаюць беларускаму заканадаўству. Ён пацвердзіў, што з прыняццем Канцэпцыі заканадаўчая база будзе ўдасканальвацца, але лічыць, што спяшацца не варта.
Міністр звярнуў увагу на нацыянальны кантэнт у СМІ – на яго думку, гэта пытанне звязана з Канцэпцыяй, таму што фармат прысутнасці айчыннага кантэнту – гэта абарона нацыянальных інтарэсаў.
Старшыня Пастаяннай камісіі па адукацыі, культуры і навуцы Палаты прадстаўнікоў Ігар Марзалюк расказаў, што ў чацвёртым раздзеле Канцэпцыі ўпершыню ёсць частка, прысвечаная традыцыйным беларускім каштоўнасцям. У ёй – захаванне культуры, мовы, таксама ўпершыню прагаворваецца тое, што беларуская дзяржава фарміруе і прасоўвае беларускую гістарычную палітыку і канцэпцыю, якая аб’ектыўна адлюстроўвае асноўныя этапы развіцця краіны.
Дырэктар Беларускага інстытута стратэгічных даследаванняў Алег Макараў адзначыў, што Канцэпцыя будзе даступная ўсім грамадзянам Беларусі, а таксама сусветнай супольнасці, плануецца яе пераклад, паколькі яна дэманструе пазіцыю Беларусі ў інфармацыйнай сферы. Якога роду сігнал Беларусь дае? У дакуменце зафіксаваны цэлы шэраг важных пастулатаў, сярод іх, напрыклад, наша краіна ўпершыню заяўляе аб тым, што мы адмаўляемся ад прымянення інфармацыйных тэхналогій на шкоду іншым дзяржавам і суб’ектам, але пры гэтым забяспечваем уласную бяспеку. Безумоўна, усё гэта адпавядае курсу беларускай палітыкі.
Алег Макараў дадаў, што ўвядзенне такой Канцэпцыі – гэта трэнд, такая сітуацыя паўсюль. У суседзяў ёсць такія дакументы, мы таксама павінны ісці па гэтым шляху.
Па словах доктара тэхнічных навук, аднаго з распрацоўшчыкаў Канцэпцыі, Аляксандра Іваноўскага, адзін з ключавых момантаў дакумента – гэта інфармацыйны суверэнітэт, забеспячэнне абароны грамадзян, арганізацый краіны ў той час, калі мы накрыты інфармацыйным каўпаком. Другое – забеспячэнне стабільнасці. Паводле яго слоў, пакуль інтэрнэт – гэта не самае стабільнае асяроддзе, а Канцэпцыя дапаможа ў нейкай ступені ўрэгуляваць сітуацыю.
Спецыяліст Аператыўна-аналітычнага цэнтра пры Прэзідэнце Яўген Ліплянін спыніўся на пытанні кібербяспекі. Ён адзначыў, што ўжо распрацаваны і ў найбліжэйшы час будзе ўнесены на зацвярджэнне праект указа, які дазволіць мадэрнізаваць сістэму інфармацыйнай бяспекі ў краіне.
Якія ініцыятывы прапанавала яго ведамства? Напрыклад, стварэнне сістэмы маніторынгу інфармацыйнай бяспекі, якая будзе грунтавацца на стварэнні нацыянальнага цэнтра маніторынгу і галіновых цэнтраў. Цяпер вядзецца даследаванне, ці патрэбныя яны нам. Яшчэ ініцыяваны працэс стварэння воблачных сэрвісаў інфармацыйнай бяспекі.
Уладзіслаў Лукашэвіч, «Звязда», 13 сакавіка 2019 г.