Як атрымаць адтэрміноўку ад прызыву – кансультацыя юрыста
Паўтара года назад мы з жонкай пабраліся шлюбам, абодва ўпершыню. Нядаўна нашай дачцэ споўніўся год, а ў мяне скончылася адтэрміноўка ад службы ў арміі ў сувязі са станам здароўя. Ці маю я права цяпер не пайсці ў войска з прычыны нараджэння дачкі і на які час? Мае бацькі, дарэчы, пенсіянеры, аднак у іх, акрамя мяне, ёсць яшчэ паўналетнія сын і дачка. Ці магу я атрымаць адтэрміноўку як кармілец сваіх родных?
Л. Г., г. Мінск
На пытанне адказвае Дар’я ГРЫЦКЕВІЧ, галоўны спецыяліст упраўлення прававога рэгулявання сацыяльнай дзейнасці дзяржавы галоўнага ўпраўлення нарматворчай дзейнасці ў сферы дзяржаўнага будаўніцтва Міністэрства юстыцыі Беларусі:
– Падставы, па якіх даецца адтэрміноўка ад прызыву грамадзян на ваенную службу, службу ў рэзерве, вызначаны артыкулам 32 Закона Рэспублікі Беларусь ад 5 лістапада 1992 года «Аб воінскім абавязку і воінскай службе» (далей – Закон). Для вас прычынай адтэрміноўкі будзе з'яўляцца ўтрыманне жонкі і дзіцяці ва ўзросце да трох гадоў. Пры гэтым тэрмін дзеяння адтэрміноўкі скончыцца, калі малой споўніцца тры гады.
Адтэрміноўкай ад прызыву ў армію, згодна з Законам, могуць стаць наступныя прычыны:
- па стане здароўя;
- для працягу адукацыі;
- для праходжання інтэрнатуры і здачы кваліфікацыйнага экзамену па спецыяльнасці інтэрнатуры;
- па сямейным становішчы;
- для атрымання ваенна-тэхнічных спецыяльнасцяў;
- у сувязі з ажыццяўленнем дэпутацкіх паўнамоцтваў;
- на падставе ўказаў Прэзідэнта Рэспублікі Беларусь.
Заканадаўствам вызначана, што адтэрміноўка ад прызыву на тэрміновую ваенную службу, службу ў рэзерве, па сямейным становішчы даецца грамадзяніну, які мае:
- жонку падчас цяжарнасці – пры наяўнасці пацвярджальных дакументаў;
- жонку і дзіця ва ўзросце да трох гадоў;
- двух дзяцей;
- непрацаздольных бацькоў або іншых членаў сям»і, якія адчуваюць патрэбу па стане здароўя ў адпаведнасці з заключэннем урачэбна-кансультацыйнай (рэабілітацыйнай экспертнай) камісіі ў чужым пастаянным доглядзе, і не знаходзяцца на поўным дзяржаўным забеспячэнні.
Апошні пункт мае сілу як падстава для адтэрміноўкі ад арміі, калі ў непрацаздольных старых адсутнічаюць іншыя працаздольныя асобы, якія пражываюць на тэрыторыі Беларусі і абавязаны ў адпаведнасці з заканадаўствам краіны ўтрымліваць названых членаў сям’і і клапаціцца пра іх незалежна ад таго, пражываюць яны разам або асобна. Або калі працаздольныя асобы ёсць, аднак яны праходзяць тэрміновую ваенную службу, службу ў рэзерве, альтэрнатыўную службу.
У вашым выпадку тое, што вы клапоціцеся пра двух непрацаздольных бацькоў, якія дасягнулі агульнаўстаноўленага пенсійнага ўзросту, не можа стаць безумоўнай прычынай для адтэрміноўкі па сямейным становішчы. Нават калі ўрачэбна-кансультацыйная (рэабілітацыйная экспертная) камісія прыме рашэнне аб іх патрэбнасці ў пастаянным чужым доглядзе і яны не знаходзяцца на поўным дзяржаўным забеспячэнні, вы маеце паўналетніх брата і сястру, якія таксама абавязаны ўтрымліваць непрацаздольных членаў сям'і, дасягнуўшых пенсійнага ўзросту.
Звяртаю вашу ўвагу, што рашэнне аб прадастаўленні адтэрміноўкі ад прызыву на тэрміновую ваенную службу, службу ў рэзерве, прымаецца раённай (гарадской) прызыўной камісіяй.
Па інфармацыі «Звязда», 17 студзеня 2019 г.