Эксперты Мінбудархітэктуры паставілі кропкі ў рэгламенце паняцця «жыллё пад знос»

Мінбудархітэктуры падрыхтавала тлумачэнне па пункце 3 Указа Прэзідэнта № 463 «Аб удасканаленні парадку адабрання і прадастаўлення зямельных участкаў». Такім чынам, ажыццяўляць новае будаўніцтва на зямельных участках, якія ў будучыні плануецца адабраць для дзяржаўных патрэб, і змяняць іх мэтавае прызначэнне нельга.

Датычна прымянення названага пункта Дзяржкаммаёмасці, аблвыканкамам і Мінскаму гарвыканкаму дадзена тлумачэнне, што землекарыстальнікі да прыняцця рашэння аб адабранні зямельнага ўчастка для дзяржаўных патрэб і зносе размешчаных на ім аб'ектаў нерухомай маёмасці маюць права карыстацца зямельнымі ўчасткамі, эксплуатаваць і паляпшаць размешчаныя на іх аб'екты. Гаспадары нерухомай маёмасці могуць рабіць гэта без уліку ўстаноўленых горадабудаўнічымі рэгламентамі абмежаванняў у дачыненні да тэрыторый перспектыўнага развіцця населеных пунктаў (тэрыторый, якія падлягаюць рэканструкцыі, трансфармацыі).

Паводле інфармацыі Мінбудархітэктуры, землекарыстальнікі да прыняцця рашэння аб адабранні зямельнага ўчастка для дзяржаўных патрэб і зносу аб'ектаў нерухомасці на падставе рашэнняў, прынятых мясцовымі выканаўчымі і распарадчымі органамі, маюць права ажыццяўляць перапланіроўку жылых памяшканняў, абсталявання жылой мансарды ў габарытах існуючай паддашкавай прасторы, прыбудову санвузла, ваннай, топачных, цеплавую рэабілітацыю канструкцый дамоў.

Таксама ўласнікам такога ўчастка дазваляецца:

• узвядзенне пабудоў (веранда, тэраса, альтанка, ганак, навес);
• прыбудова пандусаў для фізічна аслабленых асоб;
• падключэнне да інжынерных сетак (вода-, электра-, газазабеспячэння, каналізацыі і сувязі);
• узвядзенне капітальных гаспадарчых пабудоў (гаража плошчай не больш за 25 квадратных метраў, адрыны для захоўвання гаспадарчага інвентару і паліва плошчай не больш за 15 «квадратаў», лазні плошчай не больш за 12 квадратных метраў), а таксама рэканструкцыя існуючых жылых дамоў і будынкаў.

Да гэтага ў прыватнага сектара асноўнай праблемай была забарона на ўсе пералічаныя дзеянні. У выпадку будаўніцтва таго ж гаража немагчыма было ўзаконіць, а значыць, узвядзенне яго пагражала штрафамі за «самаволку». Сёння ў раённых адміністрацый няма законных падстаў адмовіць людзям у праве паляпшаць свае сядзібы, пакуль няма рашэння аб канфіскацыі ўчастка.

Сяргей КУРКАЧ, «Звязда», 30 студзеня 2018 г.