Мемарандум па стрымліванні цэн на лекавыя сродкі падпісаны паміж Міністэрствам аховы здароўя і фармацэўтычнай супольнасцю

Мерапрыемства прайшло ў БелМАПА. У ім прынялі ўдзел спецыялісты Міністэрства аховы здароўя і ўсей фармацэўтычнай супольнасці краіны. На мерапрыемстве быў падпісаны мемарандум аб узаемадзеянні бакоў. У Беларусі прадоўжыцца работа па стрымліванні росту цэн на лекавыя сродкі. У дакуменце прапісаны гэты абавязак Міністэрства аховы здароўя і суб'ектаў гаспадарання, якія ажыццяўляюць фармацэўтычную дзейнасць. Праз год будуць разгледжаны вынікі выканання сумесных дамоўленасцей.

Выступаючы перад прысутнымі Міністр аховы здароўя Валерый Малашка адзначыў, што праводзімая Міністэрствам сістэмная праца дазволіла дабіцца ўстойлівага зніжэння коштаў на лекі. «Наша мэта – дамагчыся таго, каб цэны на імпартныя лекі не перавышалі ўзроўню сумежных краін», – сказаў ён. На мерапрыемстве была абмеркавана і яшчэ адна праблема – Валерый Малашка адзначыў, што ў Міністэрства звяртаюцца грамадзяне, якім фармработнікі аптэк прапануюць замежныя прэпараты і пры гэтым даюць непісьменныя каментары, маўляў, замежныя лекі вырабляюцца з больш вычышчаных субстанцый. «Патрабую спыніць такую заганную практыку», – сказаў Міністр, дадаўшы, што дзяржаўная фармакапея Беларусі ў сваіх манаграфіях на фармацэўтычныя субстанцыі змяшчае ўсе тыя ж патрабаванні да якасці прэпаратаў, што і Еўрапейская. 

Як паведаміў намеснік гендырэктара РУП «Кіруючая кампанія холдынгу «Белфармпром» Віктар Шэін, доля беларускіх лекаў у дзяржаўных аптэках «Фармацыя» стабільна перавышае 54 %. Аналіз адгрузак лекавых сродкаў на ўнутраны рынак для рознічнай рэалізацыі паказаў, што асноўным спажыўцом айчыннай фармацэўтычнай прадукцыі з'яўляецца дзяржаўная аптэчная сетка. У якасці аргумента на карысць паспяховасці працы з беларускімі лекамі Віктар Шэін адзначыў, што ўсе прадпрыемствы «Фармацыі» прыбытковыя. У цэлым доля айчынных лекавых сродкаў на беларускім рынку ў фінансавым выражэнні па выніках 2017 года склала больш за 53 %. Аб'ём фармацэўтычнага рынку Беларусі па выніках 2017 года склаў $707,9 млн. У параўнанні з узроўнем 2016-га ён вырас на $71,2 млн. На ўнутраны рынак у 2017 годзе пастаўлена айчынных лекаў на $380 млн.

Нагадаем, што ў цяперашні час холдынг «Белфармпром» кансалідаваў дзейнасць 23 арганізацый.

Па інфармацыі афіцыйнага сайта Міністэрства аховы здароўя Рэспублікі Беларусь